| | And maketh it out of his slepe to sterte | |
| | And sithnes a ryse to do hir obseruauncis | |
| | This makith Emely to haue Remembrauncis | |
| | To do honoure to may and for to ryse | |
| 190 | I clothed fressh was she to deuyse | |
| | Her yelow heer was broided on a tres | |
| | Be hynd her bak a long yerd I ges | |
| | And in the gardyn at the sonne vprist | |
| | She walked vp and doun as hir list | |
| 195 | She gadred flowris part white and rede | |
| | To make a subtyl chapelet for hir led | |
| | And as an aungel heuenly she songe | |
| | The grete tour that was so thicke and stronge | |
| | Whiche of the Castel was chief dungeoun | |
| 200 | There as the knyghtis weren in prisoun | |
| | Of whiche I tolde you and telle shal | |
| | Was euene ioynant to the Castel wall | |
| | There as this Emely had her pleyyng | |
| | Bryght was the sonne & cleer in that mornyng | |
| 205 | And Palamon this woful prisoner | |
| | As was his wone be leue of his gailer | |
| | Was risen and romed in the chambir on hy | |
| | In whiche al the noble cyte he sy | |
| | And eke the gardyn ful of braunchis grene | |
| 210 | There as fressh Emely the shene | |
| | Was in hir walk & romed vp and doun | |
| | This sorowful prisoner this Palamoun | |
| | Goth in the chambir to and fro | |
| | And to hym self compleyned of his wo | |
