| 215 | That he was born ful ofte he sayde allas | |
| | And so be fyl be auenture and caas | |
| | That thorow a wyndow thikke of many a barre | |
| | Of yren greet and squaar as ony sparre | |
| | He cast his yen vp on Emelia | |
| 220 | And ther with as he blente he cryde a | |
| | As though he were stongyn to the hert | |
| | And with that cry arcite anone vp stert | |
| | And sayde cosyn myn what eileth the | |
| | That art so pale and dedly on to see | |
| 225 | Why cryest thou who hath do the offence | |
| | For goddis loue take al in pacience | |
| | Our prison for it may non other be | |
| | Fortune hath yeue vs this aduersite | |
| | Or ellis som wikked aspect or disposicion | |
| 230 | Of saturne be som constillacion | |
| | Hath yeue vs this al they we had sworn | |
| | So stood the heuene whan we were born | |
| | We moste endure this is the short and playn | |
| | This Palamon answerd and sayde agayn | |
| 235 | Cosyn forsothe of this oppinion | |
| | Thou hast a veyn ymaginacion | |
| | This prison causid me not to crye | |
| | But I was hurt now thurgh myn eye | |
| | Vnto my hert that wol my bane be | |
| 240 | The fairnesse of a lady that I see | |
| | Yonder in the gardyn romynge to and froo | |
| | Is cause of my cryynge and my woo | |
| | I not whether she be womman or goddesse | |
