| | Comendith and saith in this manere | |
| | The palm of martirdom forto receyue | |
| 275 | Seynt Cecile fulfilled of goddis yefte | |
| | The worlde and eek her chambir gan she weyue | |
| | Witnes Cecily and Tiburces shrifte | |
| | To whiche god of his bounte wolde shifte | |
| | Crownys two of flouris swete smellynge | |
| 280 | And his aungel hem the crownys brynge | |
| | The mayde hath brought hem to blis aboue | |
| | The worlde hath wist that it is worthy certeyn | |
| | Deuocion and chastite wel forto loue | |
| | Tho shewde hym Cecily al open and pleyn | |
| 285 | That alle ydols been but a thing in veyn | |
| | For they be dombe and therto they be deef | |
| | And charged hym his ydolis forto leef | |
| | Who so that troweth nat this a best he is | |
| | Quod tho Tiburce yf I shal not lye | |
| 290 | And she gan kisse his brest that herde this | |
| | And was ful glad he couthe trouthe aspye | |
| | This day I take the for myn alye | |
| | Said this blissed faire mayden dere | |
| | And aftir that she sayde as ye mowe here | |
| 295 | Lo right so as the loue of crist quod she | |
| | Made me thy brotheris wyf right in this wyse | |
| | Anon for myn alye here take I the | |
| | Syn that thou wilt thyn ydols dispise | |
| | Go with thy brother now and the baptise | |
| 300 | And make the cleen so that thou may beholde | |
| | That angelis face whiche thy brothir of tolde | |
