| 505 | It is a shame that the pepyl shal | |
| | So skorne and lawghe at thy folye | |
| | For comynly men woot it wel ouer al | |
| | That mighty god is in his heuenys hye | |
| | And thyse ymagis wel thou maist aspye | |
| 510 | To the ne to hem self may do no profit | |
| | For in effect they be not worth amyte | |
| | This and suche other sayde she | |
| | And he wax wroth & bad men sholde her lede | |
| | Hoom vntil her hous and in her hous qd he | |
| 515 | Bren her in a bath of flamys rede | |
| | And as he bad right so was it do in dede | |
| | For in a bath they gonne her faste shittyn | |
| | And nyght and day fyre they vnder bettyn | |
| | The longe nyght and eke the day also | |
| 520 | For al the fyre and eek the grete hete | |
| | She sat al cold and felid no woo | |
| | It made her not a drope forto swete | |
| | But in that bath her lif she moot lete | |
| | For almachyns with a ful wickid entent | |
| 525 | To sle her in the Bath his sonde to her sent | |
| | Thre strokis in the necke he smoot here tho | |
| | The turmentour but for no maner chaunce | |
| | He mighte not smyte her necke atwo | |
| | And for ther was that tyme an ordenaunce | |
| 530 | That noman sholde do to no persone suche penaunce | |
| | The fourthe strook to smyten softe or sore | |
| | This turmentour durste do no more | |
| | But half ded with her necke coruyn there | |
