| | Whan that our pot is broken as I haue said | |
| | Euery man chit and holdith hym euyl apaid | |
| | Some saide it was of the fyre makyng | |
| | Some sayde nay it was of the blowynge | |
| 205 | Than was y ferd for that was myn office | |
| | Straw quod he ye be lewd and nyce | |
| | It was not temprid as it ought to be | |
| | Nay qd the fourthe stynt and herkenyth me | |
| | Be cause our fyre was nat maad of beche | |
| 210 | That is the cause and other none sitheche | |
| | I can telle where on it was a longe | |
| | But wel I woot gret strif is vs among | |
| | What quod my lord ther is nomore to doon | |
| | Of these parellis I wil be waar eftsoon | |
| 215 | I am right siker that the pot was crasid | |
| | Be as be may be ye not amasid | |
| | As vsage is leet swepe the floor swithe | |
| | Pluk vp your hertis and be glad and blithe | |
| | The mullok on an heep swepid was | |
| 220 | And on the floor cast a Canuas | |
| | And al the mullok in a side y throwe | |
| | And siftid and pikid many a throwe | |
| | Parde quod on sumwhat of our metal | |
| | Yet is there though we haue not al | |
| 225 | And though this thinge mishappid hath as now | |
| | Anothir tyme it may be wel ynow | |
| | We put our good in auenture | |
| | A marchaunt parde may not alwey endure | |
| | Tristith me wel in his prosperite | |
