| 230 | Somtyme his godis ben drenchid in the se | |
| | And som tyme it comyth sauf vnto londe | |
| | Pes quod my lord the next tyme I wyl fonde | |
| | To brynge our craft al in another plyte | |
| | And but I do sirs let me haue the wyte | |
| 235 | Ther was a defaute in som what wel I woot | |
| | Anothir sayde the fyre was ouyr hoot | |
| | But be it hoot or colde I dar say this | |
| | That we concluden euer more amys | |
| | We faylen alway of that woldyn haue | |
| 240 | And in our madnes euer more we raue | |
| | And whan we be to gedir euerichone | |
| | Euery man semyth as wyse as Salamon | |
| | But althing whiche that shyneth as gold | |
| | It is no gold as I haue here told | |
| 245 | Ne euery appyl that is fair at ye | |
| | Nys not good what so euer men crye | |
| | Right so it farith amongis vs | |
| | He that semyth wisest be swete Iesus | |
| | Is most fool when it comyth to the preef | |
| 250 | And he that semyth trewist is a theef | |
| | That shal ye knowe or that I from you wonde | |
| | Be that my tale be told vnto an ende | |
| | Ther is a chauon of Religion | |
| | Amongis vs wolde enfect al a toun | |
| 255 | Though it were as gret as was nynyue | |
| | Rome Alisaunder Troye or other thre | |
| | His sleyghtis and his infinit falsnes | |
| | Ne coude noman writen as I ges | |
