| | Lo how this theef coude his seruise bede | |
| | Ful soth it is that suche profrid seruise | |
| | Stynketh as witnesseth the olde wyse | |
| | And right sone I wol it verifye | |
| 350 | In this Chanon rote of al trecherye | |
| | That euer more delit hath and gladnes | |
| | Suche fendly thoughtis in his herte to expres | |
| | How cristis pepyl he may to mischief brynge | |
| | God kepe vs from his fals dissimulinge | |
| 355 | Nought wiste this prest with whom that he delte | |
| | Ne of his harm comyng nothing he felte | |
| | O sely preest o sely Innocent | |
| | With couetyse anon thou shal be blent | |
| | O graceles ful blynd is thy conceit | |
| 360 | No thing art thou waar of his disceit | |
| | Whiche that this fox shapen hath to the | |
| | His wylis his wrenchis thou maist not fle | |
| | Wherfore to go to the conclusion | |
| | That referrith to thy confusion | |
| 365 | Vnhappy man anone I wil me hye | |
| | To tellyn thyn vnwit and thy folye | |
| | And eke the falsnes of that other wrecche | |
| | As ferforth as my connynge wol strecche | |
| | This Chanon was my lord ye wolde wene | |
| 370 | Sire in feith and be heuen quene | |
| | It was another Chanon and not he | |
| | That can an hundrid fold more subtilte | |
| | He hath betraid folk meny a tyme | |
| | Of his falsnes it duellith me to ryme | |
