| 375 | Euer whan I speke of his falshede | |
| | For shame of hym my chekis wexen rede | |
| | Algatis they begynnen forto glowe | |
| | For reednes haue I non right wel I knowe | |
| | In my visage for fumes diuerce | |
| 380 | Of metal whiche ye haue herd me reherce | |
| | Consumed and wastid hath my reednes | |
| | Now takith hede of this chanons cursidnes | |
| | Sir quod he to the preest lete your man goon | |
| | For quicsiluer that we hadde it anoon | |
| 385 | And lete hym brynge vncis two or thre | |
| | And when he comyth as fast ye shul se | |
| | A wondir thing whiche ye saw neuer or this | |
| | Sire quod the preest it shal be do ywis | |
| | He bad his seruaunt fette hym this thing | |
| 390 | And he alredy was at his biddinge | |
| | And sente hym forth and cam anone ageyn | |
| | With this quicsiluer shortly forto seyn | |
| | And took the vncis thre to the chanon | |
| | And he hem leyde wel and faire a doun | |
| 395 | And bad the seruaunt colis forto brynge | |
| | That he anone mighte go to his werkynge | |
| | The colis right anon were y fet | |
| | And this chanon took out a crosselet | |
| | Out of his bosom and shewde it to the preest | |
| 400 | This instrument quod he whiche that thou seest | |
| | Take in thy hond and put thy self theryn | |
| | Of this quicsiluer an vnce and begyn | |
| | In the name of crist to wexe a philosophir | |
