| | Ther be ful fewe whiche I wolde it profre | |
| 405 | To shewe hem thus muche of my science | |
| | For here shulle ye se by experience | |
| | That this quiksiluer I wol mortifye | |
| | Right in your sighte anon withouten lye | |
| | And make it as good siluer and as fyn | |
| 410 | As ther is ony in your purs or myn | |
| | Or ellis where and make it malliable | |
| | And ellis hold me fals and vnstabil | |
| | Amongis folk for euer to apere | |
| | I haue a poudre that cost me dere | |
| 415 | Shal make al good for it is cause of al | |
| | My connynge whiche I you shewe shal | |
| | Voidith your man and let hym be withoute | |
| | And shit the dore whylis we be ther aboute | |
| | Our priuyte that no man vs a spye | |
| 420 | Whylis that we worke in this phylosofie | |
| | Allas as he bad fulfillid was in dede | |
| | This ilke seruaunt anone out yede | |
| | And his maister shitte the dore anon | |
| | And to her labour spedely they goon | |
| 425 | This preest at this cursid Chanons biddyng | |
| | Vp on the fyre anon set this thing | |
| | And blew the fyre and bisied hym ful faste | |
| | And this Chanon in to the crosselet caste | |
| | A powder not I neuer where of it was | |
| 430 | I made of chalk or of erthe of glas | |
| | Or som what ellis was not worth a flye | |
| | To blynde with this preest and bad hym hye | |
