| | The colis forto couchyn al aboue | |
| | For in tokenyng that I the loue | |
| 435 | Quod this chanon thyn hondis two | |
| | Shul werke al thing that here is do | |
| | Graunt mercy quod the preest & was right glad | |
| | And couchid the colis as the Chanon bad | |
| | And whyle he bysy was this fendly wrecche | |
| 440 | This fals chanon the foule send hym fecche | |
| | Out of his bosom toke a bechyn cole | |
| | In whiche ful subtilly was made an hole | |
| | And ther ynne was put of siluer limayl | |
| | An vnce and stoppid was withouten fayl | |
| 445 | The hole with wex to kepe the lymayl yn | |
| | And vnderstondith that this fals gyn | |
| | Was nat made there but it was maad before | |
| | And othir thingis that I you telle shal more | |
| | Here aftir whiche that he with hym broughte | |
| 450 | Er he cam there hym to begyle he thoughte | |
| | And so he dede er that they yede atwyn | |
| | Til he hadde ternyd hym he coude not twynne | |
| | It dullith me whan I of hym speke | |
| | Of his falshede feyn wolde I me wreke | |
| 455 | Yf I wiste how but here and there | |
| | He is variaunt he abideth nowhere | |
| | But takith hede siris for goddis loue | |
| | He took his cole of whiche I spak aboue | |
| | And in his hond he bare it priuely | |
| 460 | And whylis this preest couchid besily | |
| | The colis as I you tolde or this | |
