| | This Chanon sayde frend ye do amys | |
| | This is not cowchid as it ought to be | |
| | But sone it shal amendid be | |
| 465 | Now let me medle therwith but a whyle | |
| | For of you I haue pyte by sainte gyle | |
| | Ye be right hoot I se how ye swete | |
| | Haue here a oloth and wype alwey the weet | |
| | And whylis the prest wipid his face | |
| 470 | This Chanon took his cole with sory grace | |
| | And leyde it aboue vpon the mydwarde | |
| | Of the crosselet and blew wel aftirward | |
| | Tyl that the colis gan faste to brenne | |
| | Now yeue vs drynke quod the Chanon thenne | |
| 475 | As swithe al shal be wel I vndertake | |
| | Sit we doun and lete vs mery make | |
| | And when that this Chanon his bechyn cole | |
| | Had brought and the lymayl out of the hole | |
| | Into the crosselet it fil anon doun | |
| 480 | And so it muste nedis be resoun | |
| | Syn it so euene aboue couchid was | |
| | But therof wist the preest no thing allas | |
| | He demyd al the colis liche good | |
| | For of the slighte he no thing vnderstood | |
| 485 | And whan this alkamystre saw his tyme | |
| | Ryse vp sire preest he said anon & stond byme | |
| | And for I woot wel yngot haue ye non | |
| | Goth walkith forth and bryngith a chalkston | |
| | For I wol make of it the same shappe | |
| 490 | That an yngot is yf it may happe | |
