| | And bring eek with you a bolle or a panne | |
| | Ful of watir and ye shul wel se thanne | |
| | How that our besynes shal thryue & preue | |
| | And yet for ye shal haue no mysbeleue | |
| 495 | Ne wrong conceyt of me in your absence | |
| | I wil not be out of your presence | |
| | But go with yow and com with you agayn | |
| | The chambir dore shorltly forto seyn | |
| | They opened and shit and went hir wey | |
| 500 | And forth with hem they took the key | |
| | And comen ayen withoute ony delay | |
| | What sholde I tary al the longe day | |
| | He took the chalk and shoop it in the wyse | |
| | Of an Ingot as I shal you deuyse | |
| 505 | I sey he took out of his owen sleue | |
| | Ateyn of siluer euyl moot he cheue | |
| | Whiche that ne was but an vnce of weyghte | |
| | And takith hede now of his cursid sleyghte | |
| | He shoop his Ingot in lengthe and in brede | |
| 510 | Of this teyn withouten ony drede | |
| | So slighly that the preest it not aspied | |
| | And in his sleue agayn he gan it hyde | |
| | And from the fyre he took vp his mater | |
| | And in the Ingot he put it with mery cheer | |
| 515 | And in to the water vessel he it caste | |
| | When that hym list and bad the preest as faste | |
| | Loke what ther is put in thy hond and grope | |
| | Thou shalt fynde there siluer as I hope | |
| | What deuyl of helle sholde it ellis be | |
