| 45 | With alle humylite and abstinence | |
| | With al attemperaunce and pacience | |
| | With mesure eek and beryng of aray | |
| | Discret she was in answerynge alwey | |
| | She was as wyse as pallas dare I seyn | |
| 50 | Her facunde eek ful womanly and pleyn | |
| | None countirfetid termys had she | |
| | To seme wyse but aftir her degre | |
| | She spak and alle her wordis more and les | |
| | Sownynge in vertu and in gentilnes | |
| 55 | Shamefast she was in maydens shamfastnes | |
| | Constant in herte and euer in besynes | |
| | To dryue her out of her slogardry | |
| | Bacus hadde of her mouth no maistrye | |
| | For wil and thought doth venus encrece | |
| 60 | As men in fyre wol caste oyl or grece | |
| | And of her owen vertu vnconstreynyd | |
| | She hath ful ofte tymes here syk feynyd | |
| | For that she wolde fle the companye | |
| | Where lightly was to trete of foly | |
| 65 | As is at festis reuellis and daunsis | |
| | That been occasions of daliauncis | |
| | Suche thyngis make childryn forto be | |
| | To sone ripe and bold as men may se | |
| | Whiche is ful parlous and hath been yore | |
| 70 | For al to sone may she lerne lore | |
| | Of boldnes when she is a wyf | |
| | And ye maistresses in your olde lif | |
| | That lordis doughtris hauen in gouernaunce | |
