| | For I can be roote al that I telle | |
| 5 | My teme is euer one and alwey was | |
| | Radix malorum est cupiditas | |
| | First I pronounce whens that I come | |
| | And than my billis shewe I alle and some | |
| | Our liege lordis seal is my patent | |
| 10 | That shewe I first my body to warent | |
| | That no man be so bolde ne preest ne clerk | |
| | Me to distourbe of cristis holi werk | |
| | And aftir that telle I forth my talis | |
| | Bullis of Popis and of Cardinalis | |
| 15 | Of Patriarkis and Bisshoppis I shewe | |
| | And in latyn I speke wordis a fewe | |
| | To saueryn with my predicacioun | |
| | And forto stere men to deuocioun | |
| | Then shewe I forth my longe cristal stones | |
| 20 | I cramyd in cloutis ful of bonys | |
| | Relikes they been as wenyn they echon | |
| | Than haue I in laton a sholdirbon | |
| | Whiche that was an holy iewis sheep | |
| | Gode men say I take of my wordis keep | |
| 25 | If that this boon be wasshe in ony welle | |
| | Yf kow or calf sheep or oxe swelle | |
| | That ony worm hath ete or hym stonge | |
| | Touche he this boon anone he shal be sounde | |
| | And yet also more ferthirmore | |
| 30 | Of pokkis and of scabbis and euery sore | |
| | Shal euery sheep be hool that of this welle | |
| | Drynketh a draughte take kepe of that I telle | |
