| 150 | Fetis and smale and yong frutestris | |
| | Singars with harpis Bawdis wafreris | |
| | Suche as been verry the deuyll officeris | |
| | To kyndil and blowe the firis of lecherye | |
| | That is annexid vnto glotonye | |
| 155 | The holy wryt take I to witnesse | |
| | That lecherye is in wyne and in dronkenesse | |
| | Lo how that dronkyn Loth vnkyndely | |
| | Lay be his doughtris two vnwetyngly | |
| | So dronke he was he nyste what he wroughte | |
| | And therfore sore repente hym oughte | |
| 160 | Herodis who so wol the storyes seche | |
| | There may ye lerne and by ensampil teche | |
| | Whan he of wyne was repleet at his feste | |
| | Right at his owen tabil yaf his heste | |
| | To sle the Baptist Iohn ful giltlees | |
| | Senek saith eke gode wordis doutles | |
| 165 | He saith he can no difference fynde | |
| | Betwix a man that is oute of his mynde | |
| | And a man that is dronkelew | |
| | But that woodnes fallyn is in a shrew | |
| | Perseuerith lenger than doth dronkenes | |
| 170 | O glotenye ful of cursidnes | |
| | O cause first of our confusion | |
| | O original of our dampnacion | |
| | Til crist hadde bought vs with his blood ageyn | |
| | Lo how dere and shortly was to seyn | |
| 175 | A bought was this cursid vilony | |
| | Corupt was al this world thorou glotony | |
