| | Adam our fader and his wyf also | |
| | Fro paradys to labour and to woo | |
| | Were dryuen for that vice it is no drede | |
| 180 | For whylis that adam fastid as I rede | |
| | He was in Paradise and whan that he | |
| | Ete of the fruyt defendid on the tre | |
| | Anon he was out cast to woo and peyne | |
| | O glotenye on the oughte vs wel to pleyne | |
| 185 | O wiste a man how meny maladies | |
| | Folowith of excesse and of glotenyes | |
| | He sholde be the more mesurabil | |
| | Of his diete sittyng at his tabil | |
| | Allas the short throte the tendir mouth | |
| 190 | Makith that est and west North and south | |
| | In erthe in eyr in watir men to swynke | |
| | To gete a gloton mete and drynke | |
| | O Poule of this mater wel canst thou entrete | |
| | Mete vnto wombe and wombe vnto mete | |
| 195 | Shal god destroien bothe as Poule saith | |
| | Allas a foul thing it is be my feith | |
| | To say this worde and foulir is the dede | |
| | When men so drynkith of the white and rede | |
| | That of his throte he makith his pryue | |
| 200 | Thorow that cursid superfluyte | |
| | The apostil wepynge saith ful petously | |
| | Ther walkyn meny of whiche you told haue I | |
| | I say it now wepynhe with pitous vois | |
| | That they been enemyes of cristis crois | |
| 205 | Of whiche the ende is deth the wombe is her god | |
