| | O wombe o bely o stynkynge cod | |
| | Fulfillid of dung and of corrupcion | |
| | At eyther ende of the foul is the soun | |
| | How gret cost and labour is to fynde | |
| 210 | Thyse cookis how they stampe streyne & grynde | |
| | And turne substaunce in to accident | |
| | To fulfille al thy licorous talent | |
| | Out of the harde bonys knockyn they | |
| | The mary for they caste naught awey | |
| 215 | That may go thorow the golet softe and sote | |
| | Of spicery of leuys barke and rote | |
| | Shal be his sause ymade by delite | |
| | To make hym yet an newe appetite | |
| | But certis he that hauntith suche delicis | |
| 220 | Is ded whylis that he liuyth in the vicis | |
| | A lecherous thing is wyne and dronkenesse | |
| | It is ful of stryuynge and of wrecchidnesse | |
| | O dronken man disfigurid in thy face | |
| | Foul is thy breth foul art thou to embrace | |
| 225 | And thorow thyn dronkin nose sownyth thy soun | |
| | As though thou saydist ay Sampson Sampsoun | |
| | And yet god woot sampson drank neuer no win | |
| | Thou farist as it were a stykid swyn | |
| | Thy tonge is lost and al thyn honest curis | |
| 230 | For dronkenes is verry sepulturis | |
| | Of mannys wit and his discrecion | |
| | In whom that drynke hath dominacion | |
| | He can no counsel kepe it is no drede | |
| | Now kepe you fro the whyte and fro the rede | |
