| 410 | For whiche ful paal & wrecchid is my face | |
| | And seris to you it is no curtesie | |
| | To speke to an olde man vilony | |
| | But y trespasse othir in word or in dede | |
| | Ye may your self in holy writ rede | |
| 415 | Ayenst an olde man hore vp on his heed | |
| | Ye sholde a ryse wherfore I you rede | |
| | Ne doth to non olde man harm now | |
| | Nomore than ye wolde men dide to you | |
| | In age yf ye sholde longe abyde | |
| 420 | And god be with you wher ye go or ryde | |
| | I muste go thyder as I haue to do | |
| | Nay olde chorle be god thou shalt not so | |
| | Seyde this othir hasardour anon | |
| | Thou partist not so lightly be seynt Iohn | |
| 425 | Thou spakist right now of that treitour deth | |
| | That in this contre al our frendis sleth | |
| | Haue her my trouthe thou art his aspye | |
| | Tel where he is or thou shalt dye | |
| | Be god and by the holy sacrement | |
| 430 | For shortly thou art one of his assent | |
| | To sle vs yonge folk thou fals theef | |
| | Now seris yf that it be to you leef | |
| | To fynde deth turne vp this crokid wey | |
| | For in that groue I hym saw last be my fey | |
| 435 | Vnder a tre and there he wol abyde | |
| | For your boost he wil no thing hym hyde | |
| | Se ye that Oke right there ye shul hym fynde | |
| | God saue you that boughte al man kynde | |
