| | And you amende thus sayde this olde man | |
| 440 | And euery of thyse Riotouris so they ran | |
| | Til they cam to the tre and there they found | |
| | Of floreyns fyn golde I coyned rounde | |
| | Wel nye an echte busshellis as hem thoughte | |
| | No lengir than aftir deth they soughte | |
| 445 | But ech of theym so glad was of that sighte | |
| | For that the floreyns so fair were and brighte | |
| | That doun they sat be the precyous hord | |
| | The worste of hem he spak the firste worde | |
| | Bretheryn quod he take kepe what I saye | |
| 450 | My wit is greet though I bourde and playe | |
| | This tresour hath fortune vnto vs yeuyn | |
| | In mirthe and Iolite our lif to lyuyn | |
| | And lightly as it comyth so wol we spende | |
| | Ey goddis precyous dignyte who wende | |
| 455 | To day that we shulde haue so fair a grace | |
| | But mighte this gold be caried fro this place | |
| | Hoom to my hous or ellis vnto youris | |
| | Than mighte we say that it were al ouris | |
| | Than were we in high felicite | |
| 460 | But trewly by day it may not be | |
| | Men wolde say that we were theuys strong | |
| | And for our owen tresour don vs honge | |
| | This tresour muste be caried be nyght | |
| | As wisely and as slily as it mighte | |
| 465 | Wherfore I rede leet loke among vs alle | |
| | Draw cut let se where that it wil falle | |
| | He that hath the shortist cut with herte blithe | |
