| 555 | Now leet vs sitte & drynke & make vs mery | |
| | And aftirward we wil his body bery | |
| | And aftirward it happid hym per caas | |
| | To take the botel there the poyson was | |
| | And drank and yaf his felow drynke also | |
| 560 | For whiche anon they steruyn bothe two | |
| | But certis I suppose that Auicenne | |
| | Wroot neuer in no canoun ne in no sene | |
| | More wonder sorowis of enpoysonynge | |
| | Thus hadde thyse wrecchis two her endynge | |
| 565 | Thus endid ben thyse homicides two | |
| | And the fals empoysoner also | |
| | O cursid synne ful of cursidnes | |
| | O traytours homicides o wickidnes | |
| | O glotony o luxury o hasardrye | |
| 570 | Thou blashemar of crist with vilonye | |
| | And othes grete of vsage and of pryde | |
| | Allas mankynde how may it betyde | |
| | That to thy creatour whiche that the wrought | |
| | And with his precyous blood the bought | |
| 575 | Thou art so fals and so vnkynde allas | |
| | Now gode men god foryeue you your trespas | |
| | And ware you from the synne of auarice | |
| | My holy pardoun may you alle warisshe | |
| | So that ye offir nobillis or sterlingis | |
| 580 | Or ellis siluer sponys brochis or ryngis | |
| | Bowith your heed vnder thyse holy bullis | |
| | Comyth vp ye wyuys offrith of your wollis | |
| | Your names I entre in my roll anon | |
