| | Into the blisse of heuyn shal ye goon | |
| 585 | I you assoylle be my high power | |
| | You that wol offre as clene and as cleer | |
| | As ye were bore lo seris thus I preche | |
| | And Ihesu crist that is our soulis leche | |
| | So graunte you his pardon to resceyue | |
| 590 | For that is best I wil you not deceyue | |
| | But seris o word forgat I in my tale | |
| | I haue Relikes and pardon in my male | |
| | As fair as ony man in Engelond | |
| | Whiche were me yeue be the Popis hond | |
| 595 | Yf ony of you wol of deuocioun | |
| | Offryn and haue myn absolucion | |
| | Comyth forth anon and knelith here a doun | |
| | And mekely receyueth your pardoun | |
| | And ye shul haue my pardon that is hende | |
| | Or ellis takith pardon as ye wende | |
| 600 | Al newe and fressh at euery tounys ende | |
| | So that ye offir alwey newe and newe | |
| | Noblis or pens whiche that been gode & trewe | |
| | It is an honour to euerich that is here | |
| | That ye mowe haue a sufficiaunt pardonere | |
| 605 | To assoylle you in contre as ye ryde | |
| | For auenturis whiche that may betyde | |
| | For perauenture ther may falle on or two | |
| | Doun of his hors and breke his necke a two | |
| | Loke whiche a surete it is to you alle | |
| 610 | That I am in your feleship y falle | |
| | That may assoylle you bothe more and les | |
