| | Goth now your wey quod he al stille & softe | |
| 205 | And lete vs dyne as sone as ye may | |
| | For be my kalander it is pryme of the day | |
| | Goth now and been as trewe as I shal be | |
| | Now ellis god forbede sir quod she | |
| | And forth she goth as ioly as a pye | |
| 210 | And bad the cokis that they sholde hye | |
| | So that men mighte dyne atte none | |
| | Vp to her husbonde is she goon | |
| | And knockith at his countour boldly | |
| | Who is there quod he Petir it am I | |
| 215 | Quod she what sire how longe wol ye faste | |
| | How longe tyme wil ye rekyn and caste | |
| | Your summys and your bokis & your thingis | |
| | The deuyl haue part of all suche rekenyngis | |
| | Ye haue ynough parde of goddis sonde | |
| 220 | Com do un to day and leet your baggis stonde | |
| | Ne be ye not a shamyd that dame Iohn | |
| | Shal fastinge al this longe day goon | |
| | What lete vs go here amasse and go dyne | |
| | Ye quod this man litil canst thou deuyne | |
| 225 | The corious besines that we haue | |
| | For of vs chapmen al so god me saue | |
| | And by that lord that clepidis saint Iue | |
| | Scarcely among twies ten twelue shal thryue | |
| | Continuelly lastyng to their age | |
| 230 | We may wel make chere and good visage | |
| | And dryue forth the worlde as it may be | |
| | And kepe our astat in priuyte | |
