| 175 | They wolde that her husbondis sholde be | |
| | Hardy and wyse / riche and therto fre | |
| | And buxom to his wyf and fressh a bedde | |
| | But by that ilke lord that for vs bledde | |
| | For his honour my self to araye | |
| 180 | A sonday next I muste nedis paye | |
| | An hundrid frankis or ellis I am lore | |
| | Yet were I leuer to be vnbore | |
| | Than me were do disclaunder or vilony | |
| | And yf my husbonde mighe it spye | |
| 185 | I nere but lost and therfore I you pray | |
| | Lene me this summe or ellis muste I dey | |
| | Dane Iohn I say lene me this . C . frankis | |
| | Parde I wol not fayle you my thankis | |
| | If that ye list to do that I you pray | |
| 190 | For at a certayn day I wol you pay | |
| | And don to you what plesaunce or seruise | |
| | That I shal doon right as ye can deuyse | |
| | And but I do god take on me vengeaunce | |
| | As foul as euer hadde genylioun of Fraunce | |
| 195 | This gentil monk answerde in this manere | |
| | Now trewly myn owen lady dere | |
| | I haue on you quod he so gret a routhe | |
| | That I you swere and plight my trouthe | |
| | That whan your husbonde is to flaundris fare | |
| 200 | I wol deliuer you out of this care | |
| | For I wyl brynge you an . C . frankis | |
| | And with þt word he caught her by the shankis | |
| | And here enbraced harde and kiste her ofte | |
