| | What I haue suffrid syn I was wyf | |
| | With my husbonde al be he your cosyn | |
| | Nay qd this monk by god & by saint Martyn | |
| | He is nomore Cosyn to me | |
| 150 | Than is the leef that hangith on the tre | |
| | I clepe hym so by seynt denys of Fraunce | |
| | To haue of hym the more acqueyntaunce | |
| | And of you whom I loue specially | |
| | Aboue alle women sikirly | |
| 155 | This swere I you on my professioun | |
| | Tellith your greef lest he come doun | |
| | And hastith you and go awey anon | |
| | My dere loue quod she o dan Iohn | |
| | Ful leef were me this counsel to hyde | |
| 160 | But out it moot it may no lengir abyde | |
| | My husbonde is to me the worste man | |
| | That euer was sith the worlde began | |
| | But sith I be cam a wyf it sittith not me | |
| | To telle no wight our priuyte | |
| 165 | Neyther in bed ne in no place | |
| | God shilde I sholde it telle for his grace | |
| | A wyf sholde nat seyn of her husbonde | |
| | But al honour as I can vnderstonde | |
| | Saue vnto you thus muchel I telle shal | |
| 170 | As helpe me god he is not worth at al | |
| | In no degre the value of a flye | |
| | But yet me greuith most his nygardrye | |
| | And well ye woot that women naturelly | |
| | Desiren thingis as wel as do I | |
