| | That lasse lust hath to that sory play | |
| | For y may synge allas and wel a wey | |
| | That I was born but to no wyght quod she | |
| 120 | Dar I not telle how it stondith with me | |
| | Wherfore I thinke out of this lond to wende | |
| | Or ellis of my self to make an ende | |
| | So ful am I of drede and of care | |
| | This monk began vp on this wyf to stare | |
| 125 | And sayde allas myn nece god forbede | |
| | Ye for ony sorow or for ony drede | |
| | For do your self / but tel me your greef | |
| | Parauenture I may in your myschief | |
| | Counsel or helpe and therfor tellith me | |
| 130 | Al your annoye / for it shal secret be | |
| | For on my port hose here I make myn oth | |
| | That neuer in my lif for leef ne loth | |
| | Ne shal I of no counsel you bewreye | |
| | The same quod she to you y seye | |
| 135 | Be god and be this portose I you swere | |
| | Though men wol me al to pecis tere | |
| | Ne shal I neuer forto go to helle | |
| | Bewrey o word of thing that ye me telle | |
| | Nat for no cosynage / ne alliaunce | |
| 140 | But verily for loue / and affiaunce | |
| | Thus been they swore and there vp on I kist | |
| | And eche talkith to other what them list | |
| | Cosyn quod she yf I hadde space | |
| | As I haue none and namly in this place | |
| 145 | Than wolde I telle a legende of my lif | |
