| | Attemperly and namely in this hete | |
| | Betwix vs two nedith no straunge fare | |
| | Farwel cosyn god shilde you fro care | |
| 265 | And yf ony thing by day or by nyght | |
| | Yf it be in my power or in my might | |
| | That ye me wol comaunde in ony wyse | |
| | Hit shal be do right as ye wol deuyse | |
| | O thing or that ye goon yf it may be | |
| 270 | I pray you to lene it vnto me | |
| | An hundrid frankis for a weke or tweye | |
| | For certeyn bestis that I must beye | |
| | To store with a place that is owris | |
| | God helpe me so I wolde it were youris | |
| 275 | I shal not fayle surely of my day | |
| | Nat for a thousand Frankis o myle way | |
| | But lete this thing be secret I you pray | |
| | For yet this nyght this bestis muste I bey | |
| | And fare now wel myn owen cosyn dere | |
| 280 | Gromercy of your cost and of your chere | |
| | This nobil marchaunt and that anon | |
| | Answerde and sayde o cosyn myn dan Iohn | |
| | Now sikirly this is a smal request | |
| | My gold is yowris whan that ye list | |
| 285 | And not only my gold but my chaffare | |
| | Take that ye list god shilde that ye spare | |
| | But o thing ye knowe wel I nough | |
| | Of chapmen that her money is her plough | |
| | We may creaunce whyles we haue a name | |
| 290 | But goldlees forto be it is a shame | |
