| | Pay it ayen whan it lith at your ese | |
| | After my might fayne wolde I you plese | |
| | Thyse hundrid frankis fette he forth anon | |
| | And priuely he took hem to dan Iohn | |
| 295 | No wight of al this lond wiste of this lone | |
| | Sauyng this marchaunt and dan Iohn alone | |
| | They drynke and speke & Rome a whyle & pleye | |
| | Til that dan Iohn ridith to his abbeye | |
| | The morow cam & forth ridith this marchaunt | |
| 300 | To flandris ward his prentis brought him auant | |
| | Til he com to Briggis wel and merily | |
| | Now goth this marchaunt wel and besily | |
| | Aboute his nedis and creaunsith and bieth | |
| | He neyther pleyeth at the dys ne daunsith | |
| 305 | But as a marchaunt shortly to telle | |
| | He ledde his lif and there I lete hym duelle | |
| | The sunday next that this marchaunt was a gon | |
| | To saint denys is comyn dan Iohn | |
| | With croune and berd al fresh & newe shaue | |
| 310 | In al this hous ther nas so litil a knaue | |
| | Ne no wight ellis / but he was ful fayn | |
| | That my lord dan Iohn was comyn agayn | |
| | And shortly to the poynt right forto goon | |
| | This faire wyf acordith with dan Iohn | |
| 315 | That for his hundrid frankis he sholde al night | |
| | Haue here in his armys bolt vp right | |
| | With her leggis al so brode and so wyde | |
| | As of lengthe she may her self stryde | |
| | And this accorde parfourmyd is in dede | |
