| | In mirthe al nyght a besi lif they lede | |
| | Dan Iohn fidelid on the Ribibil | |
| | His mynstralsie is swetter than the quynybil | |
| | Til it was day that dan Iohn yede his way | |
| 320 | And bad the meyne farwel & haue good day | |
| | For non of hem ne no wight in the toun | |
| | Hath of dan Iohn ony suspecioun | |
| | And forth he ridith hoom to his abbeye | |
| | Or where hym list nomore of hym I sey | |
| 325 | This marchaunt whan that endid was the feire | |
| | To seynt denys he gan agayn repaire | |
| | And with his wyf he makith feste and chere | |
| | And tellith here the chaffar is so dere | |
| | That nedis muste he make a cheuesaunce | |
| 330 | For he was bounden in a reconysaunce | |
| | To paye twenty thousand sheldis anon | |
| | For whiche this marchaunt is to paris goon | |
| | To borow of certeyn frendis that he hadde | |
| | A certayn of frankis & some with hym he ladde | |
| 335 | And when that he was come in to the toun | |
| | For chierte and greet affectioun | |
| | Vnto dan Iohn he goth first hym to pleye | |
| | Nat forto axe ne borowe of hym moneye | |
| | But forto wite and se his welfare | |
| 340 | And forto tellyn hym of his chaffare | |
| | As frendis doon when they mete in fere | |
| | Dan Iohn hym makith feste & mery chere | |
| | And he hym tolde ful specially | |
| | How he hadde sped by and by | |
