| 345 | Thankid be god al hool his marchaundise | |
| | Saue that he muste in alle maner wyse | |
| | Makyn a cheuesaunce as for the beste | |
| | And than he sholde be in ioye and reste | |
| | Dan Iohn answerde certis I am fayn | |
| 350 | That ye in hele as comyn home agayn | |
| | And yf that I were riche as I haue blis | |
| | Of . xx . thousand sheldis sholde ye not mys | |
| | For ye so kyndely this othir day | |
| | Lent me gold and as I can and may | |
| 355 | I thanke you be god and be seynt Iame | |
| | But natheles I took it vnto our dame | |
| | Your wyf at hoom the same gold ayen | |
| | Vp on your bench she woot it wel certeyn | |
| | Be certeyn tokenys that I can you telle | |
| 360 | Now be your leue I may no lenger dwelle | |
| | Our abbot wol out of this toun anon | |
| | And in his company must I goon | |
| | Grete wel our dame myn owen nece swete | |
| | And farwel dere cosyn til we mete | |
| 365 | This marchaunt which þt was ful waar & wyse | |
| | Creaunsid hath and paid eke in paris | |
| | To certeyn lumbardis redy in her hond | |
| | The somme of golde and gate of hem his bond | |
| | And hoom he goth as mery as a popingeay | |
| 370 | For weel he knew he stood in such aray | |
| | That nedis muste he wynne in that viage | |
| | A thousand frankis aboue al his costage | |
| | His wyf ful redy mette hym atte yate | |
