| | As she was wont of old vsage algate | |
| 375 | And al that nyght in mirthe they be set | |
| | For he was riche and cleerly out of det | |
| | When it was day the marchaunt gan embrace | |
| | His wyf al newe and kiste her in the face | |
| | And vp he goth and makith it ful tough | |
| 380 | Nomore quod she be god ye haue ynough | |
| | And wantownly ageyn with hym she playde | |
| | Tyl atte laste the marchaunt thus sayde | |
| | By god quod he I am a litil wroth | |
| | With you my wyf al though it be me loth | |
| 385 | And woot ye why be god as I gesse | |
| | That ye haue maad a maner straungenesse | |
| | Betwix me and my Cosyn dan Iohn | |
| | Ye sholde haue warned me or I had gon | |
| | That he hadde you an hundrid frankis paid | |
| 390 | Be redy token and held hym euyl apaid | |
| | For that I to hym spak of cheuesaunce | |
| | Me semyd so as by his contenaunce | |
| | But natheles be god our heuyn kyng | |
| | I thoughte to axe of hym no thing | |
| 395 | I pray the wyf do nomore so | |
| | Tel me now or I fro the go | |
| | Yf ony dettour haue in myn absence | |
| | Ypayed the lest be thy negligence | |
| | I mighte hym axe a thing that he hath paid | |
| 400 | This wyf was not a ferd ne affraid | |
| | But boldly she sayde and that anon | |
| | Mary I diffie that fals monk dan Iohn | |
