| | With turment & with shamful deth echon | |
| | This prouost doth thyse Iues forto sterue | |
| | That of this murdir wist and that anon | |
| | He nolde no suche cursidnes obserue | |
| 180 | Euyl shal he haue that euyl wol deserue | |
| | Wherfore with wilde hors he did hem drawe | |
| | And aftir hangid hem by the lawe | |
| | Vp on his bere ay lieth this Innocent | |
| | Before the hy anter whyle the high masse last | |
| 185 | And aftir that the abbot and his couent | |
| | Hem spedde forto bery hym ful fast | |
| | And whan they holy water on hym cast | |
| | Yet spak this child whan spreynt it was | |
| | He sang o Alma redemptoris in the plas | |
| 190 | This abbot whiche that was an holy man | |
| | As monkes been or ellis oughte to be | |
| | This yonge child to coniure he began | |
| | And sayde o dere child I halouse the | |
| | In the vertu of the holy trinite | |
| 195 | Tel me what is thy cause for to synge | |
| | Syn that thy throte is cut to my semynge | |
| | My throte is kut vnto myn neckeboon | |
| | Sayde this child and as be wey of kynde | |
| | I sholde a deide long tyme agoon | |
| 200 | But Ihesu as ye in bokis fynde | |
| | Wol that his glory laste and be in mynde | |
| | And for the worship of his moder dere | |
| | Yet may I synge o alma loude and clere | |
| | This welle of mercy cristis moder swete | |
