| 560 | He fil in office toward a chambirleyn | |
| | The whiche that was dwellyng with Emelye | |
| | For he was wyse and wel coude aspye | |
| | Of euery seruaunt whiche that serued there | |
| | Wel coude he hewe wode and watir bere | |
| 565 | For he was yong and mighty for the nonys | |
| | And therto he was strong & big of bonys | |
| | To do that euy wight hym coude deuyse | |
| | A yeer or two he was in this seruise | |
| | Page in the Chambir of Emely the brighte | |
| 570 | And Philostrat he sayde that he highte | |
| | But half so wel a loued man as he | |
| | Ne was ther non in court of his degre | |
| | He was so gentyl of condicion | |
| | That thurgh al the court was his renoun | |
| 575 | They sayde that it were charite | |
| | That Theseus wolde enhaunse his degre | |
| | And put hym in a worshipful seruise | |
| | There that he mighte his vertu excercise | |
| | And thus withyn a while his name sprong | |
| 580 | Bothe of his dedis and of his tong | |
| | That Theseus hath take hym so nere | |
| | That of his chambir he made hym a squyere | |
| | And yaf hym gold to mayntene his degre | |
| | And eke men broughte hym out of his contre | |
| 585 | Fro yeer to yeer ful pryuely his rente | |
| | But honestly and slighly he it spente | |
| | That no man wondred how that he it hadde | |
| | And thre yeer in this wise his lif he ladde | |
