| | Thow darst not stonde be thy wyf a ryght | |
| 25 | This is my liff . but yf that I wolde fight | |
| | And out atte dore . anone I moot me dight | |
| | And ellis I am lost . but yf that I | |
| | Be lik a wilde lioun fool hardy | |
| | I woot wel she wil do me sle som day | |
| 30 | Som neyghbour and thanne go my way | |
| | For I am parlous with knyf in hond | |
| | Al be it that I . dar not her withstonde | |
| | For she is big in armys be my feith | |
| | That shal he fynde that here mysdoth or saith | |
| 35 | But lete vs passe awey from this matere | |
| | My lord sire Monk he saith be mery of chere | |
| | For ye shul tellyn atale trewly | |
| | Lo Rouchestr stondith here fast by | |
| | Ride forth myn owen lord breke not our game | |
| 40 | But be my trouthe I knowe not your name | |
| | Whethir shal I calle you my lord dan Iohn | |
| | Or dan Thomas dan Robert or dan albon | |
| | Or of what hous be ye be your fadir kyn | |
| | I vowe to god thou hast a ful fair chyn | |
| 45 | It is a gentil pasture there thou gost | |
| | Thou art nat lik a penaunte gost | |
| | Vp on my feith thou art som officere | |
| | Som worthy sexten or som celerer | |
| | For be my fadir soule as to my dome | |
| 50 | Thou art a maistir when thou art at hoom | |
| | No poure cloisterer ne no poer nouice | |
| | But a gouernour wily and wise | |
