| | But out of prison am stert be grace | |
| 745 | That thou sholdist dye of myn hond | |
| | For I defie the seuerte and the bond | |
| | Whiche that thou saist I haue made to the | |
| | What verrey fole thynk that loue is fre | |
| | And I wil loue hire magre al thy might | |
| 750 | But for as muche as thou art a knyght | |
| | And woldist darrayn here be bataille | |
| | Haue here my trouthe to morow I wil not faile | |
| | Withoute witinge of ony other wight | |
| | That here I wil be founden as a knyght | |
| 755 | And bryngen harneis right ynow for the | |
| | And chees the beste and leue the worst for me | |
| | And mete & drynke this nyght wil I bringe | |
| | I now for the & clothis for thy beddynge | |
| | And yf so be that thou my lady wynne | |
| 760 | And sle me in this wode that I am Inne | |
| | Thou maist wel haue thy lady as for me | |
| | This Palamon answerd I graunte hit the | |
| | And thus they be departyd tyl amorow | |
| | Whan eyther of hem hath leyd her feith to borow | |
| 765 | Occupied out of alle charite | |
| | O regne that woldist haue no felow with the | |
| | Ful soth is said that loue ne lordship | |
| | Wil not his thankes haue ony feleship | |
| | We fynde thus of arcite and Palamon | |
| 770 | Arcite is riden anon into the toun | |
| | And on the morow anon or it were light | |
| | Ful pryuely two harneis hath he dight | |
