| 705 | And ouer all this to sle me vtterly | |
| | Loue hath his firy dart so brennyngly | |
| | It stikyd thorugh my trew careful hert | |
| | That shapen was erst my deth or my shert | |
| | Ye sle me with your yen Emelye | |
| 710 | Ye be the cause wherfore that I dye | |
| | Of al the remenaunt of myn other care | |
| | Ne sette I not the mountaunce of a tare | |
| | So that I coude do aught to your plesaunce | |
| | And with that word he fyl doun in a traunce | |
| 715 | A longe tyme and aftirward vp stert | |
| | This Palamon that thoughte thorow his hert | |
| | He felt a cold swerd sodenly glide | |
| | For ire he quoke he nolde no lengir abyde | |
| | And whan that he hath herd arcites tale | |
| 720 | As he were wood with face ded and pale | |
| | He stirt hym vp out of the bussh thicke | |
| | And sayde arcite fals traitour wicke | |
| | Now art thou hent that louest my lady so | |
| | For whom that I haue this peyne and woo | |
| 725 | And art my blood and to my counceyl sworn | |
| | And I ful ofte haue told the here beforn | |
| | And hast be iapyd here duke Theseus | |
| | And falsly hast chaunged thy name thus | |
| | I wil be ded or ellis thou shalt dye | |
| 730 | Thou shalt not loue my lady Emelye | |
| | But I wil loue her only and no mo | |
| | For I am Palamon thy mortal fo | |
| | And though I haue no wepyn in this place | |
