| | Right as the friday sothly forto telle | |
| | Now it shyneth now it rayneth fast | |
| | Right so gan guerri venus ouer cast | |
| | The hertis of her folk right as her day | |
| 680 | His guery thought so chaungeth his aray | |
| | Selde is the friday al the woke lik | |
| | Whan that arcite hadde songe he be gan to sike | |
| | And he set hym doun withoute euy more | |
| | Allas quod he the day that I was bore | |
| 685 | How longe Iuno thurgh thy cruelte | |
| | Wilt thow werien thebes the Cyte | |
| | Alas y brought is to confusion | |
| | The blood ryal of Cadyn and amphion | |
| | Of Cadimus whiche that was the firste man | |
| 690 | That Thebes bilt or first the toun began | |
| | And of the cyte first was crouned kyng | |
| | Of his lynage am I and of his ofspryng | |
| | Be verray lyne and of stok ryal | |
| | And now I am so kaytyf and so thral | |
| 695 | That he that is my mortal enemy | |
| | I serue hym and am his squyer pouerly | |
| | And yet doth me Iuno wel more shame | |
| | For I dar not be knowe myn owen name | |
| | But there as I wont was to highte arcite | |
| 700 | Now highte I philostrat not worth amyte | |
| | Allas thou fel mars allas Iuno | |
| | Thus your ire hath our lynage al fordo | |
| | Saue only on wrecchid Palamon | |
| | That Theseus martrith in prison | |
