| | And to the groue of whiche that I you tolde | |
| | By auenture his wey he gan to holde | |
| | To make hym a garlond of the greuys | |
| 650 | Were it of wodebynde or of hawthorn leuys | |
| | And lowde he song ayens the sonne shene | |
| | May al thy flowris and thy grene | |
| | Welcome be thou fressh faire May | |
| | In hope that I som grene gete may | |
| 655 | And fro his courser with a lusty hert | |
| | In to the groue ful lustely he stert | |
| | And in a path he romed vp an doun | |
| | Where as by auenture this Palamon | |
| | Was in a bussh that noman mighte hym se | |
| 660 | For sore a ferd of his deth was he | |
| | No thing knew he that this was arcite | |
| | God woot he wolde haue trowed it ful lite | |
| | But soth is sayd go sithen is many yeris | |
| | That feld hath yen and wode hath eris | |
| 665 | Hit is ful fair aman to bere hym euyn | |
| | For alday men mete at vnset steuyn | |
| | For lityl wente arcite of his felawe | |
| | That was so nygh to herkyn of his sawe | |
| 670 | Whan that arcite hadde romed al his fyll | |
| | Palamon in the bush now sittith styll | |
| | And arcite song al the roundel lustily | |
| | In to a study he fyl sodenly | |
| | As doon thise louers in hir queynte giris | |
| | Now in the crop and now in the breris | |
| 675 | Now vp now doun as boket in a welle | |
