| | The nyght was short & faste be the day | |
| | That nedis cost he moste hym self hyde | |
| 620 | And to a groue faste besyde | |
| | With dredful herte than stalketh Palamon | |
| | For shortly this was his oppinion | |
| | That in that groue he wolde hym hyde alday | |
| | And in the night than wolde he take his way | |
| 625 | To Thebes ward his frendis forto prey | |
| | On Theseus to helpe hym werrey | |
| | And shortly eyther he wolde lese his liff | |
| | Or wynne Emelye to his wiff | |
| | This is the effect and the entent playn | |
| 630 | Now wil I turne to arcite agayn | |
| | That lityl wiste how nygh was his care | |
| | Tyl that fortune had brought hym in the snare | |
| | The mery larke messanger of may | |
| | Salueth in hir song the morow gray | |
| 635 | And fity Phebus risith vs so bright | |
| | That al the orient laughith of the sight | |
| | And with his stremys dryeth the greues | |
| | The siluer droppis hangynge on the leuys | |
| | And arcite that in the court ryal | |
| 640 | With Theseus his squyer principal | |
| | Is risyn and loketh on the mery day | |
| | And forto do his obseruaunce to may | |
| | Remembrynge on the poynt of his desire | |
| | He on his courser stirtinge lik the fire | |
| 645 | Is riden in to the feldis hym to pleye | |
| | Out of the Court were it a myle or tweye | |
