| | She thoughte thus be god I am to nyce | |
| | To sette a man that is fulfillid of vice | |
| | In his degre and an Emperour hym calle | |
| | Be god out of his sete I wol hym trice | |
| 440 | Whanne he lest wenyth sonnest shal he falle | |
| | The pepil roos vpon hym on an nyght | |
| | For his defaute and whanne he it aspyed | |
| | Out of his doris anon he hath hym dight | |
| | Alone and there he wende haue be alyed | |
| 445 | He knockid fast and ay the more he cryed | |
| | The fastir shit they the dorys alle | |
| | Tho wiste he wel he had hym self begilyd | |
| | And wente his way no lengir durste he calle | |
| | The pepil cryde and romblid vp and doun | |
| 450 | That with his eris he herde how that they sayde | |
| | Where is this fals treiteur this neron | |
| | For feer ful neer out of his witte he breyde | |
| | And to his goddis pitously he seyde | |
| | For socour but it myghte nat be tyde | |
| 455 | For drede of this hym thoughte that he deyde | |
| | An ran in to a gardyn hym to hyde | |
| | And in this gardyn fond he chorlis tweye | |
| | And sittyng be . a . fyre gret and reed | |
| | And to the chorlis two he gan to preye | |
| 460 | To sle hym and to girde of his hed | |
| | That to his body whan he were ded | |
| | Weere no despyt doon for his defame | |
| | Hym self he slough he coude no bettir rede | |
| | Of whiche fortune lowhe and had game | |
