| | As a man in his dreme is drecchid sore | |
| | And whanne that Pertelot thus herde hym rore | |
| | She was agast and sayde herte dere | |
| 70 | What eylith yow to grone in this manere | |
| | Ye be a verry sleper fy for shame | |
| | And he answerde thus Madame | |
| | I pray yow that ye take it not in greef | |
| | Be god I mette I was in such myschief | |
| 75 | Right now that myn herte is sore a fright | |
| | Now god my sweuen he recche a right | |
| | And kepe my body out of foul prisoun | |
| | I mette that I romed vp and doun | |
| | With ynne our yerde where I saw a best | |
| 80 | Was lyk an hounde & wolde haue made a reste | |
| | Vp on my body and wolde haue had me ded | |
| | His colour was betwixt yelow and reed | |
| | And tippyd was his tayl and bothe his eris | |
| | With blak vnlike the remenaunt of his heris | |
| 85 | His snowte smal with glowyng eyen tweye | |
| | Yet for his loke almost for feer I deye | |
| | This causith me my gronyng doutles | |
| | Awey quod she fy for shame hertlees | |
| | Allas quod she for be god aboue | |
| 90 | Now haue ye lost myn herte & al my loue | |
| | I can not loue a cowarde be my feyth | |
| | For certis what so ony womman seith | |
| | We alle desiren yf it myghte be | |
| | To haue husbondis hardy wyse and fre | |
| 95 | And secret and non nygard ne no fool | |
