| | Ne hym that is agast of euery tool | |
| | Ne none auauntour be god aboue | |
| | How durst ye sey for shame vnto your loue | |
| | That ony thing mighte make you a feerde | |
| 100 | Haue ye no mannys herte & haue a berde | |
| | Allas and conne ye be a ferd of sweuenys | |
| | No thing but vainte god woot in sweuene is | |
| | Sweuenys engendren of replexion | |
| | And of synne and of complexion | |
| 105 | When humours been to habundaunt in a wight | |
| | Certis this dreme whiche ye haue met to nyght | |
| | I telle yow trouthe ye may trust me | |
| | Cometh of your superfluyte & rede colour parde | |
| | Whiche cause folk to drede in her dremys | |
| 110 | Of arowes and of fyre with rede lemys | |
| | Of grete bestes that wole hem byte | |
| | And alle as a Iape not worth a myte | |
| | Right as the humour of Melancolye | |
| | Causeth many a man in slepe to crye | |
| 115 | For feer of grete bolis and beris blake | |
| | Or ellis blake deuylles wol hem take | |
| | Of humours coude I telle also | |
| | That worken a man in slepe mykyl wo | |
| | But I wil passe as lightly as I can | |
| 120 | Lo Caton whiche that was a wyse man | |
| | Sayde he not thus . do no fors of dremys | |
| | Now sir quod she whan we fle fro the bemys | |
| | For goddis loue as takith sum laxatif | |
| | Vp peryl of my soule and my lif | |
