| | That bothe of coler and of malencolye | |
| | Ye purge you and for ye shul not tary | |
| | Though in this toun be non apotecary | |
| | I shal my self two herbis teche yow | |
| 130 | That shal be for your hele & for your prow | |
| | And in your yerd tho herbis shal I fynde | |
| | The whiche haue of her proper kynde | |
| | To purge you benethe and eke aboue | |
| | Foryet not this for goddis owen loue | |
| 135 | Ye be right colerik of complexion | |
| | Where the sonne is in his ascension | |
| | Ne fynde ye not of humours hote | |
| | For yf ye do I dar ley a grote | |
| | Thanne shal ye haue a feuyr terciane | |
| 140 | Or an agew that may be your bane | |
| | A day or two ye shul haue digestyuys | |
| | Of wormys or ye take your laxatiuys | |
| | Of laureal centory and of fumetory | |
| | Or ellis of the elderberyes that growyn ther by | |
| 145 | Of Catapuce or of gaytre beryes | |
| | Of herbe yue growyng in your yerd that mery is | |
| | Pluk hem vp as they growe and ete hem yn | |
| | Be mery husbond for your fadir kyn | |
| | Dredith no dreme I can say you nomore | |
| 150 | Madame quod he gramercy of your lore | |
| | But natheles as touching Catoun | |
| | That of wisedom hath suche a gret renoun | |
| | That he bad no dremys forto drede | |
| | Be god men may in olde bokis rede | |
