| | A ha the fox and aftir hym they renne | |
| | And eek with staues meny othir menne | |
| | Ran colle our dogge talbot and garlonde | |
| | And malkyn with her distaf in her honde | |
| 565 | Ran cow and eek the very hoggis | |
| | For they so sore a ferd were of the doggis | |
| | And showtyng of men & of wommen eek | |
| | They ronne so her herte thoughte to breke | |
| | They yellyn as fendis doon in helle | |
| 570 | The doggis criden as men wolde hem quelle | |
| | Out of the hyuys com the swarm of bees | |
| | The gees for feer fley ouer the trees | |
| | So hidons was the noyse a benedicite | |
| | Certis Iacke Straw ne his meyne | |
| 575 | Ne made neuir showtes half so shrylle | |
| | When that they wolde ony flemyng kylle | |
| | As that day was maad vp on the fox | |
| | Of bras they blew the trompes & of box | |
| | Of horn & boon in whiche they powpyd | |
| 580 | And therwith they shrikyd and shoutyd | |
| | It semed as though heuyn sholde falle | |
| | Now godemen I pray you harkyn alle | |
| | Lo how fortune turnyth sodenly | |
| | The hope and the pryde of her enuy | |
| 585 | This cok that laye vp on this foxis bak | |
| | In al his drede vnto the fox he spak | |
| | And sayde sire yf I were as ye | |
| | Yet sholde I say as wis god help me | |
| | Turnyth ayeen ye proude chorlis alle | |
