| 60 | And do al thyn entent and thy corage | |
| | To fostre it tenderly with mete and drynke | |
| | Of alle deyntees that thou canst bethinke | |
| | And kepe it al so clenly as thou may | |
| | Al though his cage of gold be neuer so gay | |
| 65 | Yet hath this brid by twenty thousand fold | |
| | Leuer in a forest that is wilde and cold | |
| | Go ete wormys and suche wrecchidnes | |
| | For euer this brid wol do his besynes | |
| | To ascape out of his cage when he may | |
| 70 | His liberte the brid desirith ay | |
| | Leet take a cat and fostre hir with mylk | |
| | And tender flesh and make her couche of silk | |
| | And leet her se a mous go by the wal | |
| | Anon she weyuith flesh and couche and al | |
| 75 | And euery deynte that is in that hous | |
| | Suche appetit hath she to ete the mous | |
| | Lo here hath lust his domynacion | |
| | And appetit flemyth discrecion | |
| | As the wolf hath also a vilens kynde | |
| 80 | The lewdist wolf that she may fynde | |
| | Or leest of reputacion that wol she take | |
| | In tyme when her lust to haue a make | |
| | Alle thyse ensamplis speke I be thyse men | |
| | That been vntrewe and no thing by women | |
| 85 | For men haue euer a licorous appetit | |
| | On lower thing to perfourme her delit | |
| | Than on her wyuys be they neuer so feir | |
| | Ne neuer so trewe ne so deboneir | |
