| | Men leye as lowe that on as that othir | |
| | Right so betwix an open teraunt | |
| 120 | And an out lawe or a theef erraunt | |
| | The same I say ther is no difference | |
| | To Alisaundir was told this sentence | |
| | That for the tiraunt is of gretter might | |
| | Beforce of meyne to sle doun right | |
| 125 | And brenne hous & hoom & make al pleyn | |
| | Lo therfore is he clepid a capteyn | |
| | And for the outlawe hath but smal meyne | |
| | And may not do so gret harm as he | |
| | Ne brynge a contre to so greet myschief | |
| 130 | Men clepe hym an outlawe or a theef | |
| | But for I am a man not textuel | |
| | I wol not of this trete neuer a deel | |
| | I wol go to my tale as I began | |
| | Whan Phebus wyf had sent for her lemman | |
| 135 | Anon they wroughten alle their lust volage | |
| | This whyte crowe that hyng ay in the cage | |
| | Beheld her work and sayde neuer a worde | |
| | And when hoom was come Phebus the lord | |
| | This crowe song cuckow cuckow | |
| 140 | What brid quod Phebus what syngist thow | |
| | Ne were thou not wont so merily to synge | |
| | That to my hert it was a reioysing | |
| | To here this vois allas what song is this | |
| | Be god quod he y synge not amys | |
| 145 | Phebus quod he for al thy worthynes | |
| | For al thy beaute and thy gentilnes | |
