| 1005 | And god so wisly on my sowle rewe | |
| | As I shal euene Iuge be and trewe | |
| | Ye shul non othir ende with me make | |
| | That one of you shal be ded or take | |
| | And yf ye thinke this is wel said | |
| 1010 | Saieth your auys and holde you payd | |
| | This is your ende and your conclusion | |
| | Who lokith now lighty but Palamon | |
| | Who spryngeth vp for ioye but arcite | |
| | Who cowde telle or who coude endite | |
| 1015 | The ioye that made is in this place | |
| | When Theseus hadde do so fair a grace | |
| | But doun a knees wente euery wight | |
| | And thanked hym with al her myght | |
| | And namely the Thebans ofte sithe | |
| 1020 | And thus with good hope and herte blithe | |
| | They take her leue and homward they ryde | |
| | To Thebes with olde wallis wyde | |
| | I trowe men wolde it deme negligent | |
| | ʒyf I foryete to telle the entent | |
| 1025 | Of Theseus that goth so besily | |
| | To make vp the listis ryally | |
| | That suche an nobyl entre as it was | |
| | I dar wel say in this worlde ther nas | |
| | The curuyt a myle ther of was aboute | |
| 1030 | Wallid with stoon and diched round aboute | |
| | Round was the shappe in maner of a compas | |
| | Ful of degrees the highest of sixty paas | |
| | That whan aman was set in on degre | |
