| | The sakryd terys and the weymentynge | |
| | The firy strokys and the desirynge | |
| 1065 | That loues folkes in this worlde enduryn | |
| | The othes be her couenauntis assuren | |
| | Plesaunce hope desire and fool hardinesse | |
| | Beaute and yongthe baudry and richesse | |
| | Charmys and sorcerye lesinges and flaterye | |
| 1070 | Dispence besinesse and Ielowsye | |
| | That wered of yelow gold a garlond | |
| | And a Cuckow sittyng on her hond | |
| | Feestis instrumentis carollis and daunsis | |
| | Lust and aray and alle the circumstauncis | |
| 1075 | Of loue whiche that I rekene and shal | |
| | Be ordir were peynted on the wall | |
| | And mo than I can make mencion | |
| | For sothly al the mounte of sitheon | |
| | There venus hath hir principal dwellyng | |
| 1080 | Was shewd on the wal here portreyyng | |
| | With al the ioye and al the lustinesse | |
| | Nought was foryeten the Porters idelnesse | |
| | Ne Narcysus the faire yore agoon | |
| | Ne yet the folye of kyng Salamon | |
| | The enchauntement of Medea and hardynesse | |
| | Of Iason I wil not now expresse | |
| | Ne of turnus with his hard fyre corage | |
| | The riche Cresus caytifs in seruage | |
| | Thus may ye se that wisedom ne riches | |
| 1090 | Beaute sleyghte strengthe ne hardinesse | |
| | Ne may with venus holde champartye | |
