| | For as she list the worlde may she gye | |
| | So alle thyse folk caught were in her lase | |
| | Tyl they for wo ful ofte sayde allas | |
| 1095 | Suffiseth thyse ensamplis one or two | |
| | And thowgh I coude rekene a thousand mo | |
| | The statu of venus glorious for to se | |
| | Was maad fletynge in the large se | |
| | And fro the nauyl doun she was | |
| 1100 | With wawis bright as ony glas | |
| | A cotel in hir right hond hadde she | |
| | And on her hed ful semely on to se | |
| | A rose garlond fressh & wel smellyng | |
| | Aboue her heed douues also fleyng | |
| 1105 | Beforn hir stood her sone cupido | |
| | Vpon his shuldris wyngis hadde he two | |
| | And blynd he was as it is ofte seen | |
| | A bowe he baar and arowes cleen | |
| | Why sholde I not eke telle of the wall | |
| 1110 | The portreyynge that was on hit all | |
| | With in the tempyl of mighty mars the rede | |
| | Al was peynted the wallis in lengthe & brede | |
| | Lyke to the Estris of the grysly place | |
| | That hight the grete tempyl of mars in trace | |
| 1115 | In that cold northern frosty regioun | |
| | There as mars hath his souereyn mansion | |
| | First on the wal was peyntyd a forest | |
| | In whiche ther dwellith neyther man ne best | |
| | With knotty & knarry bareyn treys olde | |
| 1120 | Of stubbis sharp & hidous to beholde | |
