| 1185 | And ouer his hed ther shynen two figurys | |
| | Lyke vnto the figure of virgynys | |
| | That one puella hight that othir Iulius | |
| | This god of armys was arayd thus | |
| | A wolf ther stood beforn hym at his feet | |
| 1190 | With yen rede and of aman he eet | |
| | With subtile pensel was peyntyd this story | |
| | In redowndynge of Marce and of his glory | |
| | Now to the tempyl of dyane the chaste | |
| | As shortly as I can I wyl me haste | |
| 1195 | To telle yow al the descripcion | |
| | Depeyntyd on the wallis vp and doun | |
| | Of huntynge and of shamefast chastite | |
| | There saw I how woful Calistope | |
| | Whan that dyane greuyd was with here | |
| 1200 | Was turned fro womman in to a bere | |
| | And aftir was she maad the lood sterre | |
| | Thus was it peynted I can say no ferre | |
| | Her sone is eke a sterre as men may se | |
| | There saw I dyane turned vntil a tre | |
| 1205 | I mene not the goddesse dyane | |
| | But Peneus doughter whiche that highte dyane | |
| | There saw I atheon an hert I makyd | |
| | For vengeaunce that he saw dyane al nakyd | |
| | I saw how that houndis haue hym caught | |
| 1210 | And fretyn hym for that they knew hym nought | |
| | Yet I peynted was a lityl furthermore | |
| | How athalante huntyd the wylde bore | |
| | And meliager and meny other moo | |
