| 1475 | But sodenly she saw a sighte queynt | |
| | For right anon on of the fyris queynt | |
| | And quyckyd agayn and aftir that anon | |
| | That oher fyre was queynt and al agon | |
| | And as it queynt it made a whisshing | |
| 1480 | As don thyse wete brondis in her brennyng | |
| | And at the brondis ende out ran anon | |
| | As it were dropis blody many on | |
| | For whiche so sore agast was Emely | |
| | That she was almost mad and gan to cry | |
| 1485 | For she ne wiste what it signifyed | |
| | But only for feer thus hath she cryed | |
| | And wepte that it was pyte to here | |
| | And therwith al dyane gan appere | |
| | With bowe in hond right as an hunteres | |
| 1490 | And sayde doughter stynt thyn heuynesse | |
| | Among the goddis an hyghe it is affermed | |
| | And by etern worde writen and confermed | |
| | Thow shalt be weddid vntil one of two | |
| | That haue for the so moche care and woo | |
| 1495 | But vnto whiche of hem may I not telle | |
| | Fare wel for I may no lenger dwelle | |
| | The fyris whiche on myn anter brenne | |
| | Shul the declarer or thow go henne | |
| | Thyn auenture of loue as in this caas | |
| 1500 | And with that word the arowes in the caas | |
| | Of the goddesse clateren faste and rynge | |
| | And forth she wente & made a vanysshinge | |
| | For whiche this Emely astonyed was | |
